معادش يعملوها تحل بلوغ في 2010

مساطتْ الحكاية أه؟
معادش يعملوها تحل بلوغ في 2010 هكّا ولاّ؟
آش جاي تعمل هوني؟

أش مزّال ما حكاوش فيه الصّحاح متاع التدوين في تونس و خاصة المدوّناتْ اللّي تتكلّم بالعربي؟
جايبها ضمار و نقد و درا شنُوّة, معادش يعملوها راهو تسخّن البايتْ...توّا باش تلقى شكون يقرالك؟ صعيب شويّة راهو

النّاس طايرة على البلوغوسفار سيدي خويا!, قالّك هالأيّاماتْ الدنّيا و "الفي-كاستْ"!! تنادي لشخص عندو شويّا هدرة باش يبيعها على حكاية "لاموضة" و تبدا تهز فيه و تُنفض و هو يجاوب على سؤالاتك باللّي يقدر, شيء يعمل الكيف بالصوت و الصّورة ياأبا قلبْ

سكّرولك الفايسبوك متاعك جاي تتلوصق و تتحكّك على المدوّنين؟ يا راجل راهو فمّا شكون بدا يكتب من 2005 معناها ناس عندهم عالأقل خمسة سنين أقدميّة عليك, أين أنتَ منهُ يا فتى؟

و ما فيبالكش أنّو المدوّنين ولاّو مكروهين و يعيّطولهم "مُنَوّنين" معناها ناس يعملو في القباحة بلسانهم؟ ولاّ ما تفرّجتش على الجماعة المكرّزين؟ لا؟ آه مالا لازمك تتفرّج في العرض متاعهم "النمر المُقنّع" شيء كبير و منطق أحلى مالعسل و قُدرة عالإقناع ما فمّاش اُختها اللّي يقُلّك

عامل مدوّنة ياخي ما عندك ما تصنع؟ تخدم موظّف هكّا ولاّ؟ تُرطل فيهُم نهار كامل كيف الموظّفين الكل, و أوّلهُم عرفك؟

...

كانت هاذي بعض الأسئلة اللّي طرحها عليّا مُخي قبل ما نكتب هالكليمتين...أما توضيح صغير للعباد اللّي ما تعرفنيش, موش أول مرّة نكتب و موش أوّل تنوينة نعملها و من غادي جات حكاية الرقم 2 اللّي تقراوه في العُنوان, ولكن ولّيتْ نحس بفراغ كبير بعد ما تسكّر حسابي على الفايسبوك بفضل المجهوداتْ الجبّارة متاع البهلّل (جمع بهلول)النّافحين بتسكير بروفيلاتْ العباد و اللّي حكاو عليهُم بما فيه الكفاية, ولهذا نتصوّر أنّو يزّيهُم ما خذاو وقت و حبار و حرقان عصاب (و كيما كان يقول سليم البهيم: حتّى الخرا باش نعملولو مغارف؟) ولهذا ننتقلو لما أهم مالفايسبوك اللّي تشلّك بما فيه الكفاية إلى درجة أنّي ولّيتْ نحمد ربّي على خاطر خرجتْ قبل المهازل اللّي تصير فيه كُل يوم...على كُل ميشو موضوعنا

حبّيتْ الحاصل معناها نرحّب بروحي و نتمنّا لروحي بلوغ مبروك: يعيّشني و يتربّا في عزّي, يتربّا ببودوس